Duha ka pushers dakpan sa Lapu-Lapu

CEBU, Philippines – Kapin sa P60 mil nga gituohang shabu ang nasakmit sa kapolisan human nila madakpi ang usa ka suspetsadong drug pusher didto sa Sitio Jansen, Barangay Punta Engaño dakbayan sa Lapu-Lapu kagahapon sa buntag.

Si Chief Inspector Mark Gifter Sucalit, hepe sa Lapu-Lapu City Police Office intelligence branch miila sa dinakpan nga mao si Glenn Dihayco, 39, nagpuyo ra usab sa maong dapit.

Nakuha gikan kang Dihayco ang 10 ka gagmay’ng pakete ug usa ka medium-sized nga putos sa gituohang shabu ingon man ang lainlaing drug paraphernalia. Nasakmit usab sa kapolisan ang P500 nga gituohang halin sa drugas ingon man ang P100 nga buy-bust money.

Kaniadtong Miyerkules sa buntag, nadakpan usab sa kapolisan sa Lapu-Lapu si Joel Paquibot ug nakuhaan kini og P128 mil nga shabu didto sa iyang panimalay sa Sitio Bagumbayan, Barangay Mactan.

Gawas ni Paquibot, apil nga gidakop mao si Rey Jan Cano nga mipalit og usa ka paketeng shabu sa wala pa ang raid. (BANAT NEWS)