CEBU, Philippines – Nasakmit ang armas ug shabu gikan sa usa ka tawo nga gikatahapan nga nalambigit sa mga pagpanulis sa Lungsod sa Carmen ug mga sikbit nga mga lugar. Si Senior Police Officer 3 Danilo Laurente sa Carmen Police Station niila sa nadakpan nga si Ronald Calzada Enojales, 33-anyos, nagpuyo sa Sitio Upland, Poblacion, Dakbayan sa Danao.
Matud ni Laurente nga una’ng nadawat sa ila’ng buhatan ang taho labot sa wala hiilhi’ng lalaki nga nagbarug sa ngitngit nga bahin sa daplin sa karsada.
Dugang ni Laurente nga usa ka nagpakabana nga molupyo nga nakasigpat sa suspek ang dali nga nagpahibalo sa ila’ng buhatan.
Si Senior Police Officer 1 Edgar Papaya ug mga kauban ang dali nga nakatubag sa alarma ug ang suspek nga nakakita sa nagpadulong nga sakyanan sa kapolisan ang nagdali unta sa pagsakay sa gi-parking nga motorsiklo apan gisugat kini ni Laurente hinungdan sa pagkasikop. Sa pagrekisa ila’ng nasakmit ang kalibre .38 nga may mga bala ug nasakmit usab nila ang tulo ka pakete’ng shabu. (Romeo T. Limpangog/GMR)(BANAT NEWS)