Kaso sa TB sa Toledo nidaghan
CEBU, Philippines – Nidoble ang kaso sa tuberculosis (TB) sa dakbayan sa Toledo karong tuiga itandi sa nakalabay’ng tuig matud pa ni Dr. Esperanza Canumay labaw sa city health Toledo.
Matud ni Esperanza nga base sa ilang talaan anaa lang kapin sa usa ka gatos ang nagkasakit sa TB sa Toledo sa nakalabay nga tuig.
Apan gikan sa buwan sa Enero hangtud karong buwana ning tuiga anaa na sa kapin 400 ka kaso sa TB ang natala.
Gipasalig hinuon ni Esperanza nga adunay paigong tambal ang ilang buhatan para niini.
Ug libre kini nga ihatag sa mga pasyente nga naghambin sa maong balatian.
Dugang niini giawhag sa maong opisyal nga kadtong adunay sakit nga TB ang pagbisita sa ilang buhatan aron mahatagan og tambal.
Ang TB makatakboy kini pinaagi sa kontak sa laway sa tawo nga naghambin sa maong balatian ug paggamit sa butang nga gigamit niini nga personal nga gamit.
Apan mahatagan og alibyo ang maong sakit kun mosunod lang sa rekomendasyon sa mga doktor sa mga tambal nga angayang imnon nga libreng ihatag sa Toledo City Health Office. – /EIM) (BANAT NEWS)
- Latest
