Dalaga nadakpan sa CIDG-7 nakuhaan og P1.2M shabu

CEBU, Philippines – Nadakpan ang usa ka dalaga human kini makuhaan og mga pinaketeng gidudahang shabu nga nagkantidad og di mominos P1.2 milyon kagahapon sa hapon diha sa usa ka business area sa Barangay Hipodromo sa Dakbayan sa Sugbo.

Ang dinakpan mao si Mary Ann Ruta, 33, taga Barangay Mabolo ning maong dakbayan.

Si Ruta gidakop sa mga operatiba sa Criminal Investigation and Detection Group-7 human kini mibaligya sa usa ka police asset og usa ka medium nga pakete sa shabu nga nagkantidad og  P10,000.

Matud ni Senior Superintendent Marlon Tayaba, ang acting chief sa CIDG-7, nga usa ka semana nilang gi-monitor si Ruta human adunay nakahatag kanila og impormasyon nga makabaligya kini og tagsa ka kilong shabu matag semana.

“So ma-classify siya as level two drug pusher,” sigon niya.

Mga alas dos kagahapon sa hapon, si Ruta nga misakay og taxi didto nakigsabot sa police asset mihatag sa   shabu nga iyang gisulod og itom nga pouch.

Apan sa pagdakop sa kapulisan kaniya, nahibaw-an nga aduna pa gyud diay kini dala nga lima ka medium ug duha ka dagko nga pakete nga gidudahang shabu.

Matud ni Tayaba nga ang tanang nasakmit kang Ruta mitimbang   og  104 ka gramos ug mokantidad ngadto sa P1,227,200 base sa Dangerous Drugs Board value.

Sigon pa ni Tayaba si Ruta  mitug-an nga nakatrabaho kini kaniadto sa Japan apan nihunong ug misulod sa maong ilegal nga negosyo.

Si Ruta nga nahinabi sa mga sakop sa media mihangyo nga dili na lang usa siya mokomento sa mao nga pasangil.

Ang suspek anaa karon sa prisohan sa CIDG-7 ug mag-atubang og tukmang kaso sa kalapasan sa Comprehensive Drugs Act of 2002. –  /EIM) (BANAT NEWS)