Mandaue wa’y firecracker zone

CEBU, Philippines – Gipahimangnoan sa kapolisan ug kabomberuhan ang mga molupyo sa kabarangayan sa dakbayan sa Mandaue sa paglikay sa paggamit og paboto panahon sa Pasko.

Si Senior Fire Officer 3 Cefreniano Codilla Jr., imbestigador sa Bureau of Fire Protection sa dakbayan, nga nahinabi sa Banat News niingon nga ang kasamtangan karon nila’ng gihimo ang pagpahimangno sa mga molupyo sa kabarangayan sa paglikay og gamit sa baratohon nga dayandayan sa Pasko.

Naglakip na niini ang mga series light nga ginama gikan sa nasud sa China nga barato apan mao na hinuon ang mahimo’ng hinungdan sa sunog tungod kay dali man kini mo-spark.

“Dili gyud maayo nga mangiyawat ta ana’ng baratohon lang nga series light nga makamugna na hinuon og sunog,” matud ni Codilla.

Gitataw ni Codilla nga higpit usab nila’ng gidili ang pagpamaligya og paboto sa dakbayan ug gumikan niini wala sila mohatag og permit sa mga vendors karong tuiga.

Dugang ni Codilla nga ang ila’ng buhatan wala motumbok og dapit sa dakbayabn nga firecracker zone nga nagpasabot nga wala gyud itugot ang pagpamaligya og paboto.

Si Superintendent Julian Entoma, officer-in-charge sa Mandaue City Police Office, niingon nga sila sa kapolisan mosakmit sa mga paboto nga ilegal ang pagpamaligya.

Gitataw niya nga sa mga kalihukan sa Simbang Gabi nga magsugod karong Disyembre 16, mao’y ila’ng himuon ang pagdestino og mga polis sa nagkadaiya’ng simbahan. – /GMR) (BANAT NEWS)