Ginang ‘gipatay’ sa kagawad

CEBU, Philippines - Naligo sa iyang kaugalingong dugo ug wala nay kinabuhi nga nagsuot na lang og panty ang 40-anyos nga ginang dihang nakit-an sulod sa kasilyas sa balay sa usa ka retiradong pari diha sa Barangay Daanlungsod, Tuburan niadtong adlaw nga Domingo sa hapon.

Ang biktima giila nga si Genie Amancio Canapas, minyo nagpuyo sa maong dapit, samtang ang gitudlo nga suspetsado mao si Samuel Canillo, kapin 50- anyos ang pangidaron ug konsehal sa maong barangay.

Sumala pa ni Senior Police Officer 2 Alden Abayabay sa Tuburan Police nga nahinabi sa Banat News adunay amiga ang biktima nga nagtrabaho nga katabang sa maong balay nga iyang gibisita.

Matud pa ni Abayabay nga katapusang nakitang buhi ang biktima alas 2 sa hapon nianang adlawa human milakaw ang iyang amiga ug laing caretaker sa balay kay nagpalit og ingredients sa ilang lutoon nga biko.

Paglabay sa pipila ka oras, nibalik ang caretaker ug iyang nakita ang biktima sulod sa kasilyas nga nagbuy-od, wala na’y sapot ug nag-panty na lang apan adunay daghang samad dinunggaban sa lawas.

Sa gihimong imbestigasyon, adunay mga bata nga nakakita sa suspek nga nigawas sa luyo nga bahin sa balay ug kini nagkadugo ug walay pang-itaas nga sinina maong gipangita kini.

Kagahapon sa buntag nadakpan si Canillo gibanabang 200 metros gikan sa nahitaboan ug nitago sa kakahoyan ug aduna kini samad dinunggaban sa tiyan.

Dugang pa ni Abayabay nangluspad na ang konsehal sa dihang ilang naabtan kay daghan nang dugo nga niawas kaniya.

Narekober sa kapulisan sa crime scene ang usa ka kitchen knife nga gidudahang gigamit sa krimen. (BANAT NEWS)