P72M shabu nasakmit sa CCPO
CEBU, Philippines - Miabot na sa kapin P72 milyones nga kantidad sa shabu ang nasakmit sa Cebu City Police Office (CCPO) gikan sa bulan sa Enero hangtod bulan sa Oktobre ning tuiga.
Kini maoy gitug-an sa hepe sa City Intelligence Branch (CIB), Superintendent Romeo Santander nga nahinabi sa mga balita.
Sa kinatibuk-an miabot na sa P76, 687, 392 ang kantidad sa drugas nga ilang nasakmit ug mas dako kini itandi sa nakalabay nga tuig.
Matud pa ni Santander nga kung basihan ang ilang datos sa nakalabay nga tuig misaka ngadto sa 50 porsiyento ang kantidad sa drugas nga ilang nasakmit karon.
Si Santander mipasabot nga kini gumikan sa mga naunang gipagawas nga kamandoan nga pahugtan pa ang kampanya batok sa drugas hinungdan nga aktibo sila karon sa pagpanakop ug dako ang natampo sa mga opisyal sa barangay nga maoy nagsige og hatag kanila og impormasyon.
Apan di tanang barangay ang nikooperar sa CCPO, matud pang Santander kadtong mga barangay nga notado na sa problema sa drugas padayon gihapon niini.
Sulod sa napulo ka bulan miabot na usab sa 198 ka buy-bust operation ang ilang gihimo, 19 usab ka operasyon gamit ang warrant of arrests, diin sa kinatibuk-an miabot sa 634 ka mga operasyon ang ilang napatigayon.
Kini miresulta sa pagkasikop sa 178 ka mga pushers ug 715 users ug ang kinadaghanan niini nadakpan niadtong bulan sa Hulyo.
Samtang usa ka Manuel Navarro, 43, ang gidakop sa mga sakop sa Mambaling Police Station sa Dakbayan sa Sugbo atol sa gihimong operasyon diha sa Sitio Ubos, Barangay Basak San Nicolas niadtong nakalabay nga gabii.
Giila ang dinakpan nga si Manuel Navarro, 43, nga taga Sitio Ubos nga nakuhaan og dul-an P.5M nga shabu human siya gidakop kay nibaligya og usa ka paketeng shabu.
Si Senior Inspector Regino Maramag Jr., miingon nga sibaw na kaayo ang pangalan sa suspek nga tigpayuhot og drugas diha sa maong dapit.
Si Navarro miangkon nga namaligya kini og drugas apan wala na kini modugang og komento dihang gipangutana sa media kabahin sa mga ebidensiyang nasakmit kaniya. (Jojo C. Ugdol/EIM)(BANAT NEWS)
- Latest
