Botika gilungkab

CEBU, Philippines – Gituohang moabot sa kapin sa usa ka milyon ka pesos nga kantidad sa salapi ang nadala sa mga kawatan nga milungag sa bungbong ug mikawat sa usa ka iladong botika nga nahimutang diha sa national highway, sa Barangay Poblacion lungsod sa Argao.

Nadiskubrehan kini pasado alas 7 kagahapon sa buntag sa  pharmacist nga si Tiffany Tiu kinsa maoy miabri sa establisamento apan nakita niya nga nabuslot na ang bungbong sa ilang botika.

Matud pa ni Senior Inspector Alejandro Batobalonos ang hepe sa Argao Police nga nahinabi sa Banat News,  iyang naestorya ang general manager sa maong botika ug kini mitug-an kaniya nga gibanabanang kapin sa milyon ka pesos nga ilang kinitaan sa nakalabay nga semana ang nadala sa mga kawatan.

Apan matud pang Batobalonos, ang area manager wala mokompirmar nga ingon niadto kadako ang kwartang nawala tungod kay naghimo pa sila og imbentaryo.

Sa inisyal nga imbestigasyon sa kapulisan sa Argao gitug-an ni Batobalonos nga gi-tayming sa mga kawatan nga nibundak ang kusog nga ulan nianang pagkagabii.

Gamit ang barra de kabra, pliers, barina nga de mano ug gabas sa puthaw nakasud ang mga kawatan agi sa gibungkag nilang kongkretong bungbong sa likod nga bahin sa botika.

Sumala pa ni Batobalonos nga giplanohan gyud og maayo sa mga kawatan ang maong krimen. Nasuta nga ang narekober nga mga gamit aduna pay mga price tags nga gipalit gikan sa usa ka sikat nga mall sa dakbayan sa Sugbo.

Adunay gwardiya ang maong botika ug ingon man closed-circuit television (CCTV) camera apan kung manirado mouli ang guwardiya ug pawngon usab ang ilang kuryente lakip na ang CCTV.

Adunay selopin sa usa ka sikat nga bakeshop nga nabiyaan tapad ra usab sa pharmacy ang nakuha sa kapulisan sa crime scene ug kini usab ang ilang gisubay sa pamasin kung nakuhaan sa ilang CCTV ang mga kawatan nga gituohang namalit pa og pan ug nangaon sa sud.

Nasayran usab sa hepe nga matag adlaw nga Lunes maoy schedule  pagkuha  sa armored vehicle sa kinitaan sa maong botika. Sigun pa ni Batobalonos nga lagmit dili taga Argao ang mihimo sa krimen  apan aduna kini kontak nga maoy naggiya sa mga kawatan. – /EIM) (BANAT NEWS)