3 karnaper patay
CEBU, Philippines - Tulo ka mga gidudahang carnappers og mga motorsiklo ang napatay sa nahitabong pinusilay tali sa ilang grupo ug sa mga sakop sa Danao City Police Station diha sa Sitio Portland, Barangay Cahumayan, Dakbayan sa Danao niadtong Sabado sa tungang gabii.
Si Police Officer 3 Nelson Pantoja sa Danao Police Station miila sa tulo nga namatay mao sila si Eduardo Vasquez, 52, Roberto Thomas Perez, 26, ug Riel Mural.
“Ang tulo, suspetsado kini sa mga pagpangarnap og motorsiklo nga ang mga tag-iya nagpatala sa blotter sa among buhatan. Mao nga dugay na kini namong gipangita,” matud pa ni Pantoja.
Ang kapolisan nakadawat og impormasyon gikan sa usa ka concerned citizen nga nagpahibalo bahin sa presensya sa grupo nga pulos armado ug naghantak diha sa Barangay Cahumayan kauban ang laing mga kalalakin-an.
Tungod niini, siyam ka mga sakop sa City Intelligence Branch (CIB) nga gipangulohan ni Police Officer 3 Fiel Restauro ang daling miadto sa lugar. Matud pa nga sa pagsita sa mga polis gimandoan dayon sila sa pagtahan sa ilang mga armas.
Apan inay tumanon ang mando sa mga polis nangibot hinuon sila og mga armas ug namusil hinungdan nga sila gibawsan.
Si Vasquez nakabaton og duha ka samad pinusilan sa iyang lawas, upat usab ka samad pinusilan ang naangkon sa lawas ni Perez, samtang mga samad pinusilan sa kilid sa lawas ang naangkon ni Mural. Nadakpan usab sila si Wilson Vasquez, 47; Al Joseph Batucan, 30; Michael Edward Vasquez, 28; and Glen Batucan 28, nga kaduwa og hantak sa tulo nga napatay sa polis.
Matud pa ni Pantoja nga si Vasquez nakuhaan og KG 9 submachine pistol, kalibre .45 usab ang nakuha kang Perez ug kalibre .357 magnum revolver usab ang nakuha kang Mural uban sa mga kabhang ug mga bala nga wala pa makabuto ang nasakmit niini.
Si Pantoja miingon nga ilang gisugyot ngadto sa mga pamilya sa mga suspek nga ipaubos sa autopsy ug paraffin test ang mga lawas aron pagsuta kun tinuod bang nakapabuto sa ilang mga armas ang mga nakalas. - /EIM (BANAT NEWS)
- Latest
