9-anyos gikulata, gilugos sa drayber

CEBU, Philippines – Gipangita karon sa kapolisan sa Consolacion ang usa ka drayber sa habal-habal nga giingong nilugos ug nikulata sa usa ka 9-anyos nga batang babaye  diha sa barangay Danglag, Consolacion.

Ang maong bata nalandig sa Vicente Sotto Memorial Medical Center ug gikatakdang ipaubos sa strees debriefing sa mga social welfare officers.

Si Police Officer 1 Marjorie Paller, sa Women’s and Children’s Protection Desk sa Consolacion Police Station, miingon nga ang apohan nga babaye sa maong bata mao ang midala niini sa ilang buhatan.

Matud pa ni Paller nga ang bata nalayo sa iyang apohan nga naninda niadtong tungora apan matud pa gipasakay kini sa wa pa mailhi nga drayber sa habal-habal.

Gidala kini sa usa ka lugar nga dili na kaayo mahinumduman sa bata kun asa ug didto gibun-og kini ug gilugos ug pagkahuman gibiyaan sa maong lugar.

Nakit-an na lang ang maong bata sa lain nga drayber sa habal-habal ug gihatod ni sa barangay hall sa barangay Danglag ug gipatawag ang apohan niini. Ang bata daling gidala ngadto sa Vicente Sotto Memorila Medical Center. Matud pa ni Paller nga dili pa kaayo nila maestorya ang bata apan ilang masabtan gikan sa iyang estorya nga gibun-og siya ug gilugos.

Ang kapolisan mopahigayon pa’g dugang imbestigasyon aron pag-ila sa milugos sa bata. - /EIM) (BANAT NEWS)