Pagtanum sa mga bakhaw sa lusayan sayop

CEBU, Philippines – Giawhag sa Cebu Chamber of Commerce and Industry-Bantayan Island Chapter (CCCI-BC) ang rehiyonal nga buhatan sa Department of Environment and Natural Resources (DENR) nga i-restore ang sea grass area o lusayan sa kabaybayunan sa isla sa Bantayan nga gitamnan og mga bakhaw.

Ang CCCI-BC nagkanayon nga nisuporta sila sa rehabilitation ug restoration measures sa coastal, marine resources ug sanctuaries sa lugar.

Matud sa CCCI-BC nga ang DENR nitugot sa pagpatanum og mga bakhaw sa lusayan diin makamugna kini og kadaut sa natural ecosystem dili lang sa lugar lakip na ngadto sa uban pa’ng lugar. Ang CCCI-BC niawhag sa DENR nga kuhaon ang mga gitanum nga bakhaw sa lusayan sa barangay Luyong Baybay, isla sa Doong, Bantayan aron ma-restore ang natural ecosystem.

Subay niini, si William Villaver, coastal resources management officer sa Provincial Environment and Natural Resources (PENRO), nagkanayon nga ang DENR adunay gi-implementar nga proyekto sa lugar nga mao ang Mangrove Beach Forest Development Project ug ang DENR nananum og mga bakhaw diha sa lusayan.

Gipasabot ni Villaver nga ang baybayon aduna lima ka ecosystem nga gilangkuban sa sand, beach, mangrove, sea grass ug corals.

Giingong ang mga tawo sa lugar gisuholan kini og P3 matag usa ka turok sa bakhaw nga ila’ng matanum apan anha lang sila patamnon sa lugar nga gagmay ang sea grass.

Matud ni Villaver nga ang gireklamo sa CCCI-BC diha lang sa Luyong Baybay apan sa iya’ng pakisusi tanan na’ng isla sa Bantayan ang gipangtamnan.

Gipasabot ni Villaver nga kung mawagtang ang mga lusay, ang mga marine species sama sa swaki, balat ug uban pa ang mawagtangan og kapasilongan nga moresulta sa pagkawala.

Ang lugar wala na kini’ bas tungod sa sige og kubkob diin gigamit sa pagtukod og mga balay ug ang mga corals o gasang naguba na usab tungod sa dynamite fishing ug wala na usab sila’y mga bakhaw.

Ang Bantayan naila nga abunda sa isda’ng danggit tungod sa mga lusay.

Ang Bantayan naguba na ang ubang ecosystem apan abunda pa kini sa lusay. Matud ni Villaver nga wala’y balaud sa national nga nagdili og pagtanum og mga bakhaw diha sa lusayan.

Apan ang DENR aduna kini manual alang sa site selection o pagpili og lugar nga pwede tamnan og mga bakhaw.

Dugang ni Villaver nga nirekomendar siya sa pagpahunong sa pagpananum og bakhaw sa lusayan ug ang kabahin sa awhag sa CCCI-BC nga pagpakuha sa mga gitanum nga bakhaw angayan una kini’ng tun-an.  - /GMR) (BANAT NEWS)