Mandaue City nipalit og UAV (drone)

CEBU, Philippines - Ang dakbayan sa Mandaue mipalit og unmanned aerial vehicle (UAV) o mas naila nga drone aron gamiton sa pag-monitor sa dagan sa trapiko sa siyudad,  ug magamit usab kini panahon nga dunay emerhensiya sama sa sunog, baha ug uban pa nga kinahanglang makita gikan sa kahanginan.

Si Glenn Antigua, operations chief sa Traffic Enforcement Agency of Mandaue (TEAM) miingon  ang maong ekipo napalit sa kantidad nga P200 mil. Kini usa ka remote controlled nga ekipo nga kontrolon gikan sa Command   Center sa maong dakbayan.

Ang drone nga gipalit sa kagamhanan dako usab kaayo og kapuslanan sa  buhatan sa  City Disaster  Risk Reduction and Management Council sa pag-monitor sa mga dapit nga maigo sa katalagman.

 Ang drone adunay nakamuntar nga camera nga maoy mokuha og ‘real time’ video nga makita sa mga monitors sa Command Center.

Matud pa ni Antigua, mahimo kining makalupad og maximum altitude nga usa ka kilometro o 3,280 ka tiil nga gihabugon sulod sa 20-minutos ug kontrolon kini pabalik sa Command Center aron mag-recharge sa baterya.  (BANAT NEWS)