Nilayat sa apartment

CEBU, Philippines - Usa ka 27-anyos nga call center agent nga giingong hubog ang grabeng naangol human gikatahong misuway sa pagkutlo sa kinabuhi pinaagi sa paglaslas ug dayong layat gikan sa building sa gipuy-ang apartment sa Brgy. Mabolo sa siyudad sa Sugbo niadtong nakalabay’ng  hapon.

Dali nga gidala sa usa ka tambalanan sa dakbayan sa Sugbo ang maong call center agent kansang pangalan gipugngan sa Banat News ug padayon pang giatiman sa mga doktor gumikan sa kadaot nga naangkon.

Matud ni Senior Police Officer 4 Alex Dacua, imbestigador sa Homicide Section sa Cebu City Police Office, nga sa ilang pagpakighinabi sa roommate niini  ilang nasayran nga nagkalalis silang duha sa miaging adlaw.

Sigon ni Dacua nga ang panaglalis mahitungod sa personal nga butang ug pinansyal nga problema nga nakapahiubos pag-ayo sa maong ahente.

Niadtong Biyernes sa buntag nabantayan sa landlord sa ilang apartment nga lahi na og linihokan ug pwerte usab huboga mao nga ilang gitambagan  nga maligo ug mopahuway sa iyang kwarto.

Apan napalgan na lang nila kini sa kasilyas sa ilang kwarto nga nagkadugo na gumikan sa samad linaslasan sa iyang pulso ug dughan gamit ang gunting ug dihang gisuwayan sa pagpakgang sa iyang gibuhat, gikatahong nidagan kini padung sa ikaduhang andana ug nilayat sa ubos.

Sa laing bahin, usa ka Jaime Angela Ocales, 19, ang napalgang nagbitay ug wa nay kinabuhi diha sa iyang giabangang lawak sa Sitio Pilapil, Brgy. Casuntingan, dakbayan sa Mandaue.

Si Maryjane Torimuicha, 22 , nagpuyo sa maong dapit maoy unang nakadiskubre kaniya  ug nitawag sa mga silingan.

Matud pa nila ni PO2 Quipanes Mendoza sa Presinto 4 sa Mandaue City Police Office (MCPO) ang mga silingan nakamatikod nga init kaayo ang panaglalis sa namatay ug sa kapuyo niini sa wala pa kini makit-ing patay.

Ang hinungdan sa panaglalis mao ang pangabubho tungod kay ang namatay nagtrabaho sa usa ka pabrika ug pirmeng dugay nga mahiuli tungod sa pag-over time niini sa trabaho. (BANAT NEWS)