Tulis sa mga ahente sa Toledo, Balamban padayun

CEBU, Philippines – Gitulis sa duha ka wala ilhi’ng mga tulisan nga sakay sa motorsiklo ang ahente og sigarilyo ug kuyog niini nga drayber sa barangay Calong-calong, dakbayan sa Toledo. Sila si Amir Maamo, 39, ahente ug ang drayber nga si Crisaldo Basilisco, hingkod, pulos taga dakbayan sa Mandaue ang nidangop sa kapolisan sa Toledo human sa insidente.

Matud sa mga biktima nga kalit lang niabot ang duha ka lalaki nga nag-helmet ug ang angkas niini ang nikanaug ug niduol dayun tion sa wala matino nga kalibre sa armas ug nideklarar nga tulis.

Gikuha sa tulisan ang nakolekta nga halin nga gibanabana nga dili momenus sa P14 mil dayun nisibat.

Gawas sa sunod-sunod na pagpanulis sa dakbayan sa Toledo, susamang mga pagpanulis nahitabo usab sa kasikbit nga lungsod sa Balamban.

Biktima sa pagpanulis ang usa ka salesman sa Emperador Distillers Inc. sa national highway, Abucayan pasado alas 3 niadto’ng nakalabay nga hapon.

Ang biktima giila nga si Joseph Jorda samtang ang mga suspek sa gihapon sakay og motorsiklo nga nag-helmet.

Ang kapolisan nagtuo nga ang mga tulisan mao ra gihapon ang niigo sa nakalabay nga semana.

Asoy sa mga biktima nga kalit lang sila gihunungan sa motorsiklo nga may sakay tulo ka lalaki ug ang usa nition dayun og armas ug nideklarar og tulis. Nadala sa mga tulisan ang P10,000 nga kinolekta sa biktima.

Nagtuo ang kapolisan nga dayo lang sa ila’ng lungsod ang mga tulisan ug igo lang manayming sa ila’ng mga biktima.

Sa nakalabay nga semana sulod sa usa ka adlaw nga nagligas lang og pipila ka minutos, duha ka salesmen ang gipangtulis sa usa ka grupo. – /GMR) (BANAT NEWS)