Dul-an P300 mil shabu nasakmit
CEBU, Philippines - Amahan ug anak nga gidudahang drug pushers gironda sa mga sakop sa Regional Anti-Illegal Drugs Special Operations Task Group (RAIDSOTG) 7 nga miresulta sa pagkasikop sa anak apan nakaipsot ang amahan niini.
Ang operasyon nahitabo diha sa Candabong sa lungsod sa Alcantara nga miresulta sa pagkasikop kang Erna Antiporta, 26, apan nakaikyas ang iyang amahan nga si Ernesto, 52.
Usa ka police poseur buyer mipalit og usa ka paketeng shabu bali’g P200 ngadto ni Erna ug dihang gitunol na niya ang shabu ug gidawat ang bayad dali siyang gisignit sa kapolisan.
Apan matud pa ni Senior Inspector Joey Bicoy nakabantay si Ernesto ug misutoy og dagan palayo sa ilang balay.
Nakuha kang Erna ang 56 ka gamay nga paketeng shabu nga motimbang og 20 gramos nga mobalor og P236 mil.
Ang duha gikonsiderar nga level 2 drug pushers nga makabaligya og 300 gramos matag semana.
Samtang naaktohan sa kapolisan nga nagsuyop og shabu diha sa dalan Bonifacio Extension, Brgy. Poblacion, sa dakbayan sa Danao sila si Niel Ramos, 43 ug Minorly Macaindic, 28.
Si Police Officer 3 Ildefonzo Prosia sa Danao Police Station miingon nga dunay nakapahibalo kanila nga dunay nanuyop sa sulod sa payag sa maong dapit hinungdan nga ilang gironda ug nadakpan ang duha.
Samtang sa Tayud, lungsod sa Consolacion, nadakpan si Weries Ibale,18, ug nakuhaan og usa ka paketeng shabu ug tinfoil nga gigamit sa pagsuyop niini. (BANAT NEWS)
- Latest