Tulo positibo sa drugas

CEBU, Philippines - Tulo ka kawani sa Brgy. Labangon, Cebu City ang nagpositibo sa paggamit sa ilegal nga drugas human nigawas ang resulta sa kinalit nga drug test nga gihimo sa Cebu City Office on Substance Abuse Prevention (COSAP) nga gipangulohan ni Dr. Alice Utlang Miyerkules sa buntag.

Sumala pa nga 77 ka mga kawani ang nagpa drug test apil ang mga elected officials ug ang hepe sa Police Station 10 nga boluntaryong nisalmot niini nga si Senior Inspector Percival Miasco.

Matud pa ni Brgy. Captain Victor Buendia nga nahinabi sa Banat News, tulo niya ka mga sakop ang nagpositibo nga gilangkoban sa usa ka driver sa  garbage truck, usa ka volunteer sa disaster response ug ang bag-ong na-hire nga driver sa barangay.

Sumala pa ni Buendia ang driver sa garbage napositibo na kini sa nilabay nga drug test apan iyang gidawat sa pagtuo nga nipaubos kini sa rehabilitation program, apan wala diay kini nihuman sa programa.

Samtang ang volunteer sa disaster ug bag-ong nakuha nga driver nga bag-ong mga empleyado tangtangon niya sa trabaho ug dawaton lang pagbalik kung mopaubos sa rehabilitation ug dunay rekomendasyon sa COSAP nga nakompleto nila ang rehabilitasyon ug mosaad nga magbag-o.

Sa laing bahin, gihagit ni Utlang ang ubang mga sakop sa Cebu City Police Office nga mopaubos sa surprise drug test sama sa gibuhat ni Miasco.

Matud ni Utlang maisip nga maayong sumbanan sa uban ang gihimo ni Miasco. (BANAT NEWS)