Radaza: Lansar bisan kinsa
CEBU, Philippines - Bukas si Lapu-Lapu City Mayor Paz Radaza bisan kinsa ang molansar sa dakbayan sa eleksiyon sa 2016.
Kini human nipadayag sila si Dr. Celedonio Sitoy ug Engr. Rolando Patalinjug nga modagan sa pagka-kongresista ug mayor sa siyudad.
Matud ni Radaza nga iya’ng huwaton nga mosang-at na sa ilang kandidatura sila si Sitoy ug Patalinjug una pa siya mohatag og dugang pamahayag.
Dili kasulti si Radaza nga dili hulga alang niya ang line-up sa mga nahisgutan apan kini nitataw nga paabuton na lang kun unsa’y dagan sa piniliay.
Si Radaza niingon nga nahan-ay na ang tanan sa ilang grupo ug ilang kaatbang mao pa ang pagsugod og umol sa ilang kaubanan.
Kahinumduman nga si Sitoy kinsa igsuon ni Cordova Mayor Adelino Sitoy niluwat isip kapitan sa Gabi, Cordova ug presidente sa Association of Barangay Councils sa lungsod ug nibalhin na og puyo sa barangay Gun-ob sa dakbayan aron mopapili sa pagka-kongresista.
Si Patalinjug nga kaalyado sa mga Sitoy nipadayag sab sa iya’ng tinguha nga modagan sa pagka-mayor kay matud pa napul-an na ang katawhan sa dakbayan sa mga Radaza. (BANAT NEWS)
- Latest
