Nasabotan ni Rama ug Cortes sa trapiko gipatuman sa NRA

CEBU, Philippines - Malampuson ang panagtagbo nila ni Mayor  Michael  Rama  ug Mayor  Jonas Cortes sa miaging gabii nga ilang gitumong alang sa pagsulbad sa suliran sa trapiko nga nasinati sa duha ka dakbayan.

Ang problema mitumaw tungod sa pagsirado sa dalan S. Osmeña tungod sa nagpadayong  pagsemento niini.

Ang panagtagbo gipahigayon sa buhatan ni Rama ug kauban ni Cortes  sila si Edwin Ermac nga maoy executive officer sa Traffic Enforcement Agency of Mandaue (TEAM) ug uban pang ahensiya sa gobiyerno.

Si Cortes mipasabot ang pagpasira sa dalan S. Osmeña maoy nakaingon sa grabeng paghuot sa kadalanan sa Mandaue.

Tungod niini, giablihan ang usa ka lane sa S. Osmeña sa mga sakyanan nga molahos ngadto sa Ouano Avenue sa dakbayan sa Mandaue.

Samtang gihimo na lang nga one way ang dalan M. Logarta alang sa mga sakyanan gikan sa Mandaue padulong sa dakbayan sa Sugbo. (BANAT NEWS)