6 ka buwan suspenso ni Mayor

CEBU, Philippines – Masuspenso og unom ka buwan si Dumanjug Mayor Nelson Garcia.

Kini human gi-aprobahan sa hunta probinsiyal sa Sugbo ang rekomendasyon sa committee on complaints and investigation nga nagkombikto kang Garcia sa kaso’ng administratiba nga gipasaka ni Bise Mayor Efren Gica.

Kagahapon gibasura usab sa hunta probinsiyal ang mga motions nga giduso ni Garcia.

Usa niini ang mosyon sa pagpahunong sa tanang buhaton sa hunta probinsiyal batok kang Garcia samtang may apelar pa siya sa buhatan sa Presidente subay sa balaud.

Matud ni Bokal Grecilda Sanchez, vice chairperson sa komitiba, nga mga motions ni Garcia kuwang sa basehan.

Si Bokal Alex Binghay nisugyot nga paubsan ang silot ni Garcia ngadto sa tulo ka buwan.

Si Bokal Arleigh Sitoy, chairman sa komitiba, nagkanayun nga tun-an nila ang sugyot ni Binghay samtang may 30 ka adlaw pa si Garcia sa pagduso sa motion for reconsideration.

Si Garcia nibahad nga mopasaka og kaso’ng administratiba ug kriminal sa Ombudsman ug Office of the President batok sa mga nipirma sa committee report.

Dismayado si Garcia sa gihimo sa hunta probinsiyal nga wala gani nagtagad sa lima ka kaso nga iyang gipasaka batok ni Gica.

Ang mga kaso gisang-at niadto pa’ng Enero, Marso, Mayo, Hulyo, ug Agosto sa niaging tuig apan walay bisan usa nga gitandog sa komitiba ni Sitoy. – /GMR) (BANAT NEWS)