Mister gikulata sa asawa

CEBU, Philippines - Usa ka asawa ang mikulata sa iyang bana diha gawas sa buhatan sa Human Resource Management Office (HRMO) sulod sa Capitol Building niadtong Martes sa hapon.

Si Ruben Limbaga duty guard niadtong higayona mibutyag sa mga tigbalita nga ang maong asawa mitug-an nga 20 ka tuig na sila nga wala’y komunikasyon sa iyang bana.

Giingong nakadawat og report ang maong asawa nga ang iyang bana nagtrabaho karon diha sa Kapitolyo hinungdan nga misusi kini.

Ang bana naatlan nga mianha usab sa buhatan sa HRMO tungod kay aduna usab kini gisusi hinungdan nga nag-abot ang duha.

Giingong nasuko ang asawa sa iyang bana tungod kay gibutang sa application niini nga usa siya ka biyudo nga dako pa siya’ng buhi.

Ang duha nagkabinanghagay ug misangpot sa pisikal nga bugno ug giingong gikulata sa asawa ang iyang bana tungod sa kalagot niini.  Hinuon ang mga gwardiya ug mga bugnaw og ulo sa palibot miulang kanila.

Nasayran sa mga tigbalita nga ang bana naa madestino sa buhatan sa Provincial Environment and Natural Resources Office (PENRO) isip job order (JO) ug nagsugod sa iyang trabaho niadto pang buwan sa Enero niining tuiga.

Ang mga tigbalita misuway og kuha sa habig sa bana apan wala kini diha sa buhatan tungod kay atoa kini ngadto sa field work. Si Gobernador Hilario Davide III nagkanayon nga ipaimbestigar niya ang maong insidente. (BANAT NEWS)