Swedish hubog nanghagis

CEBU, Philippines – Nakatulog sa prisohan ang usa ka Swedish nga hubog human gireklamo sa mga residente sa Sitio Gahad, Poblacion, Sibonga ug nanghagis pa sa buhatan sa kapolisan niadtong nakalabay nga gabii.

Ang gisikop giila nga si Peter Felix Widegren, 37, ug kasamtangan nga napuyo sa maong lugar kapin na usa ka buwan.

Matud ni PO3 Teofilo Manlanat sa Sibonga Police nga dunay nitawag nga concern citizen sa ilang buhatan kay gisabaan sa langyaw nga hubog nga nakiglalis sa iyang Pinay nga hinigugma nga si Clara Amistad, 29.

Sumala pa ni Manlanat nga nagsugod ang lalis sa duha dihang gipangita sa langyaw ang yawe sa motorsiklo apan wala gihatag sa iyang uyab tungod kay hubog.

Pag-abot sa mga polis nisamot ang kasuko sa langyaw ug gihagit pa og sukmagay ang upat ka polis nga niresponde apan nadala gyud kini sa buhatan sa kapolisan.

Apan pag-abot sa police station, nanghagis ang langyaw ug nanglabay og plastic nga lingkuranan.

Nahilot ra ang kaso sanglit may paryente nga polis ang uyab nga Pinay.

Gikonsiderar usab sa kapolisan ang hapit na paglarga sa langyaw kuyog sa uyab sa gawas sa nasud. – /GMR) (BANAT NEWS)