Unom ka pushers nasikop
CEBU, Philippines - Nasikop ang unom ka drug pushers sa nagkalain-laing operasyon nga gihimo sa kapolisan sa dakbayan ug probinsiya sa Sugbo.
Usa ka Neil Dela Rita, 35, kinsa gihulagway nga level 2 drug pusher ang nasikop sa City Intelligence Branch sa Cebu City Police Office alas 5 pasado kagahapon sa hapon sa sitio Univille, barangay Kasambagan.
Lakip sa nasikop ang kapuyo ni Dela Rita nga si Jonaliza Yap, 32.
Nakuha sa kapolisan sulod sa panimalay ni Dela Rita ang 13 ka tag-as nga pakete ug duha ka medium size nga pakete sa gituohang drugas nga mikantidad og P75,000.
Niadto’ng Huwebes nasikop sab ang usa ka Darwin Vecina Saceda, 35, sa sitio Pailub, barangay Sambag II, dakbayan sa Sugbo.
Nakuha gikan ni Saceda ang 33 ka gagmay'ng pakete sa gituohang shabu balor og P15 mil, usa ka pusil nga adunay lima ka bala ug P220 nga gituohang halin sa ilegal nga drugas.
Samtang 18 ka gagmay'ng pakete sa gituohang shabu balor og kapin sa P6 mil ang nakuha gikan sa usa ka Vegil Lucernas Argallon, 25, taga Santa Cruz, lungsod sa San Francisco human kini nasikop.
Ang laing duha ka kuyog ni Argallon nga sila si Jay-ar Andrade ug Ruben Ostria ang nakasibat.
Sa lungsod sa Borbon nasikop si Ricardo Hortezuela, 39, ug nakuha gikan kaniya ang lima ka gagmay'ng pakete sa gituohang shabu.
Nasikop sab ang usa ka Neil Condes Rosaceña, 42, drayber sa traysikol, taga barangay Agujo, lungsod sa Daanbantayan sa buy-bust operation diin nakuha ang tulo ka gagmay'ng pakete sa gituohang shabu ug P300 nga halin. (Jojo C. Ugdol ug USJ-R Masscom Intern Jean Lumapas/GMR)(BANAT NEWS)
- Latest
