Sto. Niño vendors nga way pwesto: Hulagway ug estorya ni Brenda Batuto

CEBU, Philippines - Kanunay nako nga giampo kang Senyor Santo Niño nga hatagan og maayong lawas nga makapanginabuhi matag adlaw aron ‘mi makakaon, matud ni Gemma Sarvida.

Si Sarvida nag-ampo nga unta mahatagan na sila og pwesto ug dili sila abugon sa kagamhanan sa siyudad sa Sugbo  sa ilang pagpamaligya og mga relihiyosong imahen.

Usa lamang si Sarvida sa daghan pang mga stalls nga namaligya og mga imahen nga wala sa stalls nga gipatukod sa siyudad diha kilid sa Basilica Minore del Sto. Niño sa dalan D. Jakosalem.

Sugod niadtong 2004, gihigpitan na sa dakbayan ang maong mga vendors tungod kay kaniadto diha sila sa kilid sa ganghaan sa Basilica naninda ug nakahatag og problema sa traffic hinungdan nga gitukoran sila og stalls diha sa D. Jakosalem.

Si Sarvida,53,  nakahilak dihang gikahinabi sa Banat News ug mibutyag nga niadtong Miyerkules subli siyang gipahibalo nga kinahanglang mopahawa siya sa iyang pwesto sa eskina sa likod sa simbahan sa Cebu Metropolitan Cathedral tungod kay nakasamok ang iyang gamay’ng tindahan sa sidewalk.

“Hangyo unta ko ba nga tagaan mi og higayon asa mi dapita…. ibutang mi sa saktong lugar ug tabangan mi nga dunay pwesto nga matindahan,” ni Sarvida pa.

Matud ni Sarvida nga lima ka buok ang iyang anak ug walay trabaho ang iyang bana, tulo niya ka anak nag-eskuyla sa kolehiyo. Ang iyang mga anak motabang usab kang Sarvida sa pagpamuhat og mga sinina ug pag-repair sa mga imahen.

Giasoy ni Sarvida nga sukad pa niadtong 15-anyos pa siya maoy iyahang nadak-an nga panginabuhian ug mao karoy gibuhi niya sa iyang pamilya ang pagpamuhat og mga sinina ug pag-repair sa mga rebolto sa Senyor Santo Niño.

Si Sarvida kinsa nangangkong diha matawo sa dalan D. Jakosalem ug Manalili dakbayan sa Sugbo miasoy nga 12 sila ka managsuon apan siyam na lang silang nabuhi.

Matud niya ang tulo niya ka igsuon namatay sa sakit tungod sa kawad-on ug dunay namatay human naligsan, gibiyaan sila sa ilang amahan mao nga gibuhi sila sa ilang inahan kutob sa mahimo niini.

Matud niya nga 7-anyos siya kaniadto dihang gidemolis ang ilang gipuy-an kilid sa karsada, apan nagpasalamat nga gisagop sila ni Msgr. Tomas Maglasang sa Metropolitan Cebu Cathedral.

Ang inahan ni Sarvida gitabangan sa maong pari nga makatinda og mga libreta ug mga imahen sa mga santos diha sulod sa simbahan.

Apan paglabay sa lima ka tuig si Msgr. Maglasang gidestino ngadto sa laing lugar ug ang mipuli nga pari mipapahawa kanila hinungdan diha na lang   sa gawas sa simbahan naninda ang iyang inahan.Dihang nagpangidaron siya og 13-anyos duna siya’y nahigala nga dunay tindahan og mga imahen diha sa may Basilica Minore del Sto. Niño ug diha niya nakat-onan ang pagpanghimo og sinina sa mga santos.

Mokita si Sarvida  og P150 hangtud sa P500 sa pagtahi og sinina sa mga santos ilabi na sa imahen sa Senyor Santo Niño. Ang pag-repair usab sa rebolto maggikan sa P250 ug ang dako P600. Matag  nagsingabot na ang pangilin sa Balaang Bata ubay-ubay sa ilang baligya ang nahalin.

“ Kung walay pista sa Santo Niño usahay wala mi halin, mangutang lang mi sa among pagkaon malipay mi kung pista tungod kay ubay-ubay among halin ug makapamayad mi sa among balayranan apan karon ambot kung makahalin ba mi nga papahawaon man mi diri,” dugang ni Sarvida. (Brenda D. Batuto/EIM)(BANAT NEWS)