Minor nga car washer gipusil
CEBU, Philippines – Grabeng naangol ang 17-anyos nga car washer nga gipusil sa wala mailhi’ng tawo alas 7 pasado ang takna sa niaging gabii sa dalan Duterte, Poblacion, dakbayan sa Danao.
Matud ni SPO1 Ildefonzo Prosia sa Danao City Police Station nga naglingkod sa luyong lingkuranan sa traysikol ang biktima dihang kalit lang nitumaw ang wala hiilhing lalaki ug dayun pusil. Nakabaton og samad pinusilan sa iyang tuong paa ang biktima ug giusban pa unta kini og pusil apan wala na kini maigo ug ang pipila ka tawo nga nakamatikod sa mga buto sa armas ang dali nga niduol sa maong dapit sa paghimo og pakisusi.
Ang suspek nga nakamatikod sa nagpadulong nga daghang mga tawo nagdali kini sa pagsibat pahilayo sa maong dapit.
Dali nga gidala sa Danao Provincial Hospital ang biktima apan human sa paghatag og pasiunang pagtambal sa mga doktor gibalhin sa Vicente Sotto Memorial Medical Center sa dakbayan sa Sugbo. – /GMR) (BANAT NEWS)
- Latest
