Mga badlungon nga drayber pangitaon

CEBU, Philippines - Mopahigayun og massive operations ang Cebu City Traffic Operations Management (CITOM) batok sa mga badlungon nga drayber.

Kini human niingon si CITOM operations officer Jonathan Tumulak nga adunay 500 ka mga erring drivers ang na-isyuhan og bench warrant sa niaging tuig.

Matud niya nga tunga sa 500 ka bench warrants ang na-serve sa mga drivers ug ang katunga niini ilang paningkamutan nga ma-serve sa mga badlungong drayber.

“Naa ta’y massive operation against erring drivers karong buwan kay nakita nato naka-cause og traffic ang mga violators labi nga duna ta’y dagku nga kalihukan sama sa Sinulog, so ato gyud hugtan og maayo og implement sa traffic rules,” matud ni Tumulak.

Matud niya nga wala maasikaso sa CITOM ang pag-serve sa bench warrants sa niaging tuig tungod nag-focus sila sa traffic management sa siyudad sa Sugbo. Adunay mga gipatuman nga mga eksperimento sa kadalanan nga gipatuman sa CITOM aron hingpit nga masulbad ang trapiko. Sigun ni Tumulak nga makasulbad sa trapiko sa siyudad sa Sugbo kun tanang mga draybers motuman sa balaud.

Tinguha sa CITOM karong tuiga nga mokunhod ang mga draybers nga maisyuhan og citation tickets maong ilang panghingusgan ang ilang kampanya batok sa mga badlungon.

Matud ni Tumulak nga kining mga drayber maisyuhan og bench warrant kun mapakyas sila pag-settle sa ilang mga violations human ma-isyuhan og citation ticket.

Awhag niya nga mas maayong moduol ang mga drayber nga nalutsan og citation ticket sa mga traffic enforcers aron malikayan nga mapasakaan og kaso sa CITOM.

“Daghan na sab ang nasulbad nga violations sa mga draybers katong miduol gyod sa buhatan sa CITOM. Kaning among pagpanakop paagi gyod ni namo nga makahibaw atong mga drayber nga seryoso mi sa kampanya batok sa mga badlungon, mopasaka gyud mi og kaso,” matud ni Tumulak. (BANAT NEWS)