10 drug pushers/users nadakpan

CEBU, Philippines – Napulo ka gituohang drug pushers ug users, apil ang pito ka babaye, gipangdakop sa mga polis sa buwag nga operation didto sa dakbayan sa Toledo ug dinhi sa dakbayan sa Sugbo.

Sa Toledo, si Emily Navarro, 39, taga Barangay Poblacion, maoy target sa buy-bust operation sa mga polis kay giingon nga usa siya ka “level 3” drug pusher nga makabaligya og daghang shabu, matud ni Inspector Jovito Labra.

Gawas kang Navarro, nadakpan usab sila si Emerito Barquin, Epefania Ubas, 40, taga Barangay Luray Dos ug Trece Alcomendras, 30, pareho’ng taga Toledo.

Usa ka poseur buyer ang nipalit og shabu kang Barquin ug sa iyang pagtunol sa pakete sa gituohang shabu bugti sa P500 nga marked money, siya gidakop dayon sa mga polis.

Si Navarro nakadagan paingon sa iyang balay apan gigukod siya sa mga polis ug didto nadakpan uban sa duha ka suspek nga nag-pot session sulod sa balay.

Si Navarro nakuhaan og upat ka pakete sa shabu, samtang si Barquin nasakmitan og usa ka medium ug large size nga pakete sa shabu ug laing pakete sa gituohang pinauga nga marijuana.

Nasakmit gikan kang Ubas ang gamay nga pakete sa shabu samtang kang Trece mga drug-sniffing paraphernalia.

Gibanabana nga mokabat og P38 mil ang kantidad sa maong nasakmit nga ginadiling drugas.

Samtang, unom ka lalaki ang nasikop sa usa ka raid sa balay sa gituohang drug pusher sa Sitio San Miguel, Barangay Lorega-San Miguel, dakbayan sa Sugbo kaniadto’ng Sabado sa buntag.

Ang raid gipangulohan ni Parian Police chief Ryan Devaras nga armado og search warrant nga giisyu ni RTC Executive Judge Soliver Peras. Si Jessie Lozano, alyas “Tangi,” 59, maoy target sa raid.

Nakasibat hinuon si Lozano atol sa raid apan nasikop sa kapolisan ang upat ka babaye ug duha ka lalaki sulod sa balay ni Lozano ug nakuhaan sila og mga drug paraphernalia.

Ang mga nasikop mao sila si Michel Martinez, 24, Joeres Macabinlar, 28, Jamay Ga, 21, Darling Arolde, 30, pulos mga dalaga, ingon man sila si Mark Alesna, 32, ulitawo ug Roel Lozano, 38, minyo. Sila’ng tanan nagpuyo ra gihapon sa Lorega-San Miguel.

Nasakmit sulod sa balay ni Lozano ang 30 ka gagmay nga pakete sa gituohang shabu. – /RUB) (BANAT NEWS)