Presyo sa drugas mosaka

CEBU, Philippines – Human nabulabog sa New Bilibid Prison ang isyu sa ilegal nga drugas, gilauman sa Regional Intelligence Branch (RID) sa Police Regional Office-7 ang pagmahal sa presyo sa drugas sa Sugbo ilabi na sa nagsingabot nga Pasko ug Sinulog.

Matud ni Sr. Supt. Paul Labra, hepe sa RID, nga ilang nabantayan nga mas taas ang demand sa drugas sa Sugbo kung hapit na ang Pasko ug Sinulog.

Gipasabot ni Labra nga mas mosamot pa gyud ang demand sa drugas karong panahona kay nabulabog na man ang isyu sa drugas sa NBP.

Sigun pa sa opisyal nga kung nihit ang supply mas mahal ang presyo ug kini sab karon ang ilang gibantayan nga dili na makalusot paingon sa rehiyon ug sa Sugbo ang supply sa drugas.

Sumala pa ni Labra nga bisan pa man og nakatutok sila sa preparasyon sa seguridad alang sa mga dagku nga kalihukan sa Sugbo, pabilin gihapon ang ilang hugot nga pag-monitor batok sa ilegal nga drugas ubos sa kamanduan sa direktor sa PRO-7 nga si Chief Supt. Prudencio Bañas. Gitug-an sab sa hepe sa RID nga andam na sila sa umaabot nga kalihukan sa Sugbo ug duna na’y mga lugar nga gitumbok ang kapolisan kung asa ila’ng tagaan og pagtagad.

Usa sa plano karon sa kapolisan ang pagpakatap og mga detectives sa mga lugar nga dunay daghang mga tawo ug ang padayon nga pakig-alayon sa ubang intelligence unit sa mga silingan nga rehiyon. – /GMR) (BANAT NEWS)