Tulo patay sa aksidente

CEBU, Philippines – Tulo ang patay sa managlahing aksidente sa kadalanan sa probinsya sa Sugbo sa niaging adlaw.

Usa ka taxi ang mipasok sa balay sa kapitan sa barangay Dakit, Barili diin usa ka 50-anyos nga babaye nga mipalit sa tindahan sa kapitan ang nabanggaan patay. Giila ang drayber sa 6 Sense taxi nga si Joenery Restauro, 32, taga Dumlog, Talisay City kinsa giingong nakatulog sa pagpamaneho.

Ang biktima nga nataymingan nga may gipalit sa tindahan ni Kapitan Elma Bargamento naila nga si Eliza Emnacen samtang naangol sab ang usa ka 12-anyos nga batang babaye nga si Marlie Rama.

Sa Balamban, usa ang patay human nagkabangga ang duha ka motorsiklo sa barangay Cantuod sa maong lungsod.

Ang namatay naila nga si Gerdin Pilapil, 26, kinsa nagmaneho sa XRM nga motor nga taga Asturias samtang seryoso nga naangol ang drayber sa laing motorsiklo nga si Joey España, 26, nga  taga lungsod sa Asturias sab.

Sa Moalboal, patay sab ang usa ka 84-anyos nga lola human nabangaan sa usa ka motorsiklo sa barangay Tomonoy sa maong lungsod. Giila ang drayber sa motorsiklo nga si Weldy Tacoy, 26, taga barangay Balabagon sa maong lungsod.

Paingon unta nga mopauli ang drayber sa motorsiklo sa dihang kalit lang mitabok sa karsada ang lola hinungdan nga kini nasabak sa motorsiklo.

Dali pa unta nga gidala sa Badian District Hospital apan nakabsan gyud sa iyang kinabuhi ang biktima. – /GMR) (BANAT NEWS)