Kasakay sa may MERS-CoV susihon

CEBU, Philippines - Nagpaabot ang Department of Health-7 sa listahan gikan sa ulohang buhatan sa mga pasahero nga sakay sa Cebu Pacific flight SJ 997 gikan sa Manila paingon sa General Santos City.

Kini human gikataho nga sakay niini ang usa ka Pinay nurse nga positibo sa Middle East Respiratory Syndrome-CoronaVirus (MERS-CoV) niadtong Agosto 29.

Matud ni Rennan Cimafranca, pangulo sa Regional Epidemiology and Surveillance Unit-7, nga ilang sutaon kung may taga Central Visayas ba nga kasakay sa maong pasahero.

Gipasabot ni Cimafranca nga bisan dili paingon sa Sugbo ang maong flight ilaha gihapon susihon aron pagseguro nga MERS-CoV free ang Rehiyon-7.

Adunay 249 ka pasahero nga sakay ang Saudi Airlines flight SV 870 ug 143 niini ang misakay sa Cebu Pacific flight SJ 997 paingon sa General Santos City.

Matud sa DOH nga duha ka Pinay ang gi-test sa MERS-CoV niadtong Agosto 25 sa awtoridad sa Saudi Arabia apan usa lang niini ang nagpositibo.

Ang nagpositibo mao ang 37-anyos nga anaa karon sa Southern Philippine Medical Center sa Davao City alang sa confirmatory tests. (BANAT NEWS)