Raid sa Talisay

CEBU, Philippines - Nakasakmit usab ang mga polis og kapin sa P83 mil nga kantidad sa shabu human nila madakpi ang gidudahan nga drug pusher sa Sitio Tunga, Barangay Tangke, Talisay niadtong Martes. Ang balay ni Eugene Hermosisima gironda sa mga polis sa Talisay base sa pagtugot ni RTC Judge Soliver Peras. Ang report nga si Hermosisima usa ka “Level 2 Drug Pusher” nga makabaligya og 50 gramos nga shabu kada semana.

Nakaeskapo hinuon si Hermosisima apan nadakpan sa mga polis ang duha niya ka anak ug mga kauban nga sila si Mateo Resuta, 34, taga Lower Mohon, Talisay ug si Brendo Cabanero, 34, taga Lawaan 1, Talisay samtang nagsuyop og shabu.

Ang duha ka anak ni Hermosisima nga nadakpan mao ang 18-anyos nga si Aljun ug ang maguwang nga si Albert, 22. Si Inspector Rodgene Fudotan, operations chief sa Talisay Police Station miingon nga si Hermosisima naila nga drug pusher sa Tangke ug ang balay mismo niini mao’y gihimo nga drug den. Matud ni Fudotan nga si Hermosisima maoy nagtudlo sa iyang mga mga anak, apil na ang duha ka menor, kon unsaon pagbaligya sa mga ilegal nga drugas. Hinuon ang mga menor de-edad wala sa ilang balay atol sa paghimo sa operasyon.

 Nasakmit gikan sa balay ni Hermosisima ang usa ka medium-sized ug 34 nga gagmay nga pakete sa shabu, kahimanan sa paghingos sa shabu, upat ka cellphones, ug P900 nga kwarta. Ang mga nadakpan gitanggong sa Talisay Police station. (BANAT NEWS)