Drug financiers sa Bohol gi-monitor
CEBU, Philippines - Ang Police Regional Office-7 mibutyag nga aduna pa silay duha ngadto sa tulo ka mga drug financiers sa lalawigan sa Bohol nga ilang gipanid-an human sa engkwentro tali kang Romulo Caño sa operasyon adtong Biyernes sa Ubay, Bohol diin usa ang samdan ug upat ang nasikop.
Si Chief Supt. Prudencio Bañas, PRO-7 director, mibutyag nga kining ilang gipanid-an pulos drug financiers ug level one drug pushers nga lisod g’yud dakpon.
“Kasi meron na silang mga tao at sila magbibigay na lang ng drugs hindi talaga sila ‘yung nagbebenta,” matud ni Bañas. Ila usab nga gitan-aw ang posibilidad nga aduna kini mga kauban sa lalawigan sa Sugbo tungod sa dagkong financial engagements niini.
Si Superintendent Conrad Capa, deputy regional director for operation, miingon usab nga ila nang gisugdan og decode ang listahan nga ilahang nakuha gikan sa mga blue book.
“We are yet to study it and get its information,” tug-an ni Capa.
Napatay sa kapulisan pinangulohan ni Superentindent Rex Derilo si Caño kinsa didto sa iyang panimalay sa Barangay Achile samtang si Romulo Cabrera samdan sa lahing engkwentro sa kapulisan nga gipanguluhan ni Sr. Insp. Romeo Sentinta sa Barangay Poblacion.
Ang mga nasikop mao sila si Raymond Cutaran, 20; Felixberto Escalante , 47; Ramon Toyac, 43; ug Randy Quiros, 39, pulos taga Ubay.
Ang kapulisan pulos adunay dala nga search warrants sa RA 10591 or Comprehensive Firearms and Ammunitions Regulation Act nga giluwatan ni Regional Trial Court Judge Gilbert Moises, Branch 18, Cebu City.
Nakuha kanila ang mga high-powered firearms, mga bala, eksplosibo ug mga shabu lakip na ang mga “blue books” nga may listahan sa mga nalambigit sa maong negosyo.
Ang mga suspeks gitumbok nga kauban sa kanhi pulis nga napatay usab sa engkwentro nga si Owen Rosales diha sa Bien Unido nga maoy mi-ambush sa hepe sa Ubay police chief, nga si Chief Inspector Roger Caña duha ka buwan ang nakalabay. (BANAT NEWS)
- Latest
