Mosunog unta sa balay sikop

CEBU, Philippines - Usa ka 34-anyos nga lalake ang gisikop human misuway og sunog sa ilang panimaye sa Barangay Cogon Ramos, dakbayan sa Sugbo.

Si Andre Zamora Rosales, residente sa maong dapit, ang gidakop sa iyang mga silingan pinaagi sa citizen’s arrest human nakit-an nga giduslitan ang ispongha nga iyang gidala aron pagsunog sa ilang panimaye.

Ang inahan nga si Doris ang mipadakop sa iyang anak.

Matud ni PO3 Domino Decoriña sa Fuente Police Station nga nahinabi sa Banat News nga posibleng dunay problema sa pangisip ang suspek gumikan kay molikoy kini usahay kung estoryahon.

Plano karon sa kapolisan nga ipaubos sa examination ang dinakpan aron pagsuta sa tinuoray nga kahimtang sa panghuna huna.

Temporaryo una nga gitanggong sa Fuente Police detention cell ang dinakpan ug posibleng pasakaan og kasong arson. (Jojo C. Ugdol ug Jasmin Anais R. Llanillo, USJ-R Intern/GMR)

6,029 biktima sa Yolanda scholar sa TESDA

Kapin sa P40 milyones ang balor sa scholarship vouchers ang gipang apod-apod sa Technical Education and Skills Development Authority (TESDA) sa mga dapit sa Rehiyon-7 nga apektado sa bagyong Yolanda.

Si TESDA Director-General Joel Villanueva maoy nangunay sa paghatag sa naasoy’ng mga vouchers ngadto sa mga mayor atol sa iyang pagbisita sa Sugbo.

Matud ni Villanueva nga ang TESDA scholarship program sa Sugbo gipatas-an gikan sa P32 milyones alang sa 3,036 ka slots sa niaging tuig ngadto na sa  P101.268 milyones alang sa 6,029 ka mga targeted slots niining tuiga. Libreng training alang sa mga typhoon survivors aron makabarug kini sa kaugalingon nilang gamay nga negosyo pinaagi sa livelihod program sa TESDA.

Ang TESDA mohatag usab og vocational training alang sa mga makadawat sa naasoy’ng programa sama sa carpentry, welding, commercial cooking ug massage therapy nga gituohang makabukas og maayong oportunidad alang sa mga typhoon survivors. (BANAT NEWS)