Sikyu wa masweldohi kawani giluba

CEBU, Philippines - Usa ka gwardiya sa usa ka departamento sa munisipyo sa lungsod sa Carmen midunggab sa usa ka kawani.

Nalandig sa tambalanan si Emma Paquibot, 45, human gidunggab sa makadaghan nga higayon sa ilang guwardiya sa Urban Poor Office nga nahimutang sa Pilapilan, Dawis Norte sa maong lungsod.

Ang suspetsado giila nga si Jonas Sungahid, taga Plaridel Street, Looc, Mandaue City.

Matud pa ni PO3 Jerome Quimque ang desk officer sa Carmen Police Office nga nahinabi sa Banat News migawas si Paquibot sa ilang buhatan niadtong tungora dihang kalit kining giduol sa suspek  gidunggab makadaghang higayon og kutsilyo.

Nakaangkon kini og samad dinunggaban sa liog, bukton, sa nawong ug likod  ug kritikal ang kahimtang dihang gidala sa tambalanan. Ang suspek daling miikyas human sa hitabo.

Nasayran nga duna nay karaang panagbangi ang duha ug nianang adlaw giingong gisapot ang suspek tungod kay wala kini masweldohi.   (BANAT NEWS)