Drug bust usa patay

CEBU, Philippines - Patay ang usa ka lalaki nga gituohang drug pusher human sa usa ka “shoot-out” tali sa mga sakop sa City Intelligence Branch sa Cebu City Police Office hinungdan sa pagkaangol sa iyang silingan pasado alas-10 sa miaging gabii sa Sitio Riverside, Barangay Duljo-Fatima.

Ang namatay naila nga si Loyd Cabahug, samtang ang naangol naila nga si Edward Adaza, 42, molupyo sa nahisgutan nga lugar. Nakuha sa maong operasyon ang mga gidudahang drugas nga gibanabanang mokantidad og  P1 milyon.

Si Superintendent Romeo Santander, hepe sa CIB, miingon nga nakadawat sila og taho kalabot sa operasyon ni Cabahug ug iya kining gipasusi ug dihang positibo ang maong impormasyon gihimo ang maong buy-  bust.

Apan tunga-tunga sa ilang transaksyon, gikatahong nakabantay kini nga polis ang mipalit kaniya og shabu hinungdan nga miibot kini og armas dayong pusil sa mga polis.

Kini maoy hinungdan nga mibalos ang CIB pagpusil kaniya ug naigo kini sa dughan nga nakaingon sa iyang kamatayon.

Gidala pa unta si Cabahug sa Cebu City Medical Center apan gideklarar na kini nga dead on arrival.

Nasayran usab sa kapolisan nga atol sa pinusilay naigo og saag nga bala si Adaza diha sa iyang wala nga paa ug gidala  usab sa tambalanan.

Narekober sa kapolisan ang usa ka caliber .45 nga pistola, tulo ka kabhang ug lima ka bala sa kalibre .45, tulo ka kabhang sa kalibre .9mm, usa ka puthaw nga tipaka nga gituohang kabahin sa usa ka granada, magazine sa kalibre .45 nga pistola ug P3 mil nga salapi nga gituohang halin sa drugas sa suspetsado.

Narekober sad sa kapolisan ang 29 ka medium sized nga pakete nga gituohang shabu ug upat ka gamay nga pakete nga shabu nga mokabat og usa ka milyon.

Mitunga ‘sab sa lugar ang City Police Director sa Cebu City Police Office nga si Senior Superintendent Noli Romana human sa shootout.

Gisuta pa sa kapolisan kung kinsa ang kauban ni Cabahug ug kun asa niya gikuha ang iyang supply sa drugas. (BANAT NEWS)