Cebu Zoo ipakoral, pabutangan og gwardiya tungod sa kawat

CEBU, Philippines - Tungod sa lungkab nga nahitabo sa Cebu City Zoo ang manager niini nga si Giovanne Romarate mohangyo sa city government nga ipakural ug pabutangan na g’yud og blue guards ang zoo.

Matud ni Romarate nga duna nay pagtuon nga gibuhat sa perimeter fence sa Cebu Zoo ug matud pa niya nga iya na kining nasumiter sa dakbayan.

Dugang ni Romarate nga iya sab nga hangyoon nga hatagan sila og blue guards aron dili na masubli ang maong hitabo.

Kagahapong adlawa nauli na kang Romarate ang i-pad mini sa iyang anak nga si Trishia Stephany nga gikuha sa usa ka panday nga si Jonathan Cantuba.

Matud ni Romarate nga mapasalamaton kaayo siya sa kapolisan tungod sa kapaspas sa kasulbaran sa maong kaso.

Wa magtuo si Romarate nga ingon ato kapaspas ang dagan sa imbestigasyon ug sa pag-ila sa suspetsado sa krimen. Narekober sab ang tulo ka plastic drums nga gikuha sa suspect usa ka adlaw sa wala pa niya lungkaba ang maong zoo.

Gihimakak hinuon sa suspetsado nga siya ang mikuha sa box nga dunay kwarta apan giangkon niya ang krimen. Nangayo og pasaylo ang suspetsado ngadto kang Romarate atubangan sa media kagahapon sa buntag. (/EIM)(BANAT NEWS)