Kalamidad pangandaman g’yud kanunay

CEBU, Philippines -  Ang pagpasiugda og mga programa nga gitumong alang sa pagpangandam sa mahitabo nga katalagman sama sa bagyo, baha, pagdahili sa yuta,  sunog ug uban pa maoy labing kinahanglan nga pasiugdahan sa mga barangay kapitan.

Mao kini ang gibutyag ni kanhi mayor Alfredo Arquillano sa lungsod sa San Francisco, Camotes sa iyang pagpamulong sa gihimo’ng seminar sa Disaster Preparedness and Awareness nga gihimo kagahapon sa dakbayan sa Mandaue.

Ang maong seminar nga gitawag og Disaster Preparedness and  Role of Non-Government Organization (NG0)’s in Community Growth and Enhancement  nahimo pinaagi sa pagpasiugda sa pundok Taga-Mandaue, Inc.

Ang tanang 27 ka barangay kapitan sa Mandaue mitambong  gan sa maong kalihokan uban sa mga representante sa pribadong buhatan ug nagkadaiyang NGO’s nga nagbase sa Mandaue.

Gipaambit ni  Arquillano sa mga misalmot sa seminar ang iyang kasinatian dihang gipasidunggan ang lungsod sa San Francisco kaniadto sa United Nations tungod sa  ga nga pagpangandam batok sa mahitabong katalagman.

Si Arquillano mipasabot nga ang paghugpong sa mga lumolupyo maoy labing gikinahanglan alang sa pagpangandam ug mapasabot daan unsay angay nga himoon sa katawhan sa higayon nga mahitabo ang katalagman.

Matud sa kanhi mayor nga apil sa pagpangandam mao ang pag-ila sa mga kuyaw nga lugar  gang mga dapit nga mahimo nga luwas nga kabalhinan sa mga nagpuyo sa “danger zones.”  Ang kasayuran kabahin sa tukma nga pagpangandam angay’ng ipakatap sa katawhan aron sila masayod unsay tukma nila nga pagahimoon apil ang pagpananom og mga kahoy kay gawas nga makahatag kini og kabugnaw sa panahon sa ting-init makatabang usab kini pagpugong sa lunop. - /RUB (BANAT NEWS)