Skate board players nakigkita na sa CITOM

CEBU, Philippines - Ang kadagkoan sa Cebu City Traffic Operations Management nakigtagbo na sa pipila ka pangulo sa lainlaing kahugpongan sa mga batan-on nga tigduwa og roller skates ug roller blades nga sagad anha sa mga karsada magduwa.

Si Joy Tumulak, ang operations chief sa CITOM, nakigtagbo na kanila ni Rogelle Abella, Hedwig Simene ug Cyr Othello Simene nga moangkong lider sila sa pipila ka grupo sa mga tigduwa og skates.

Giangkon sa mga tigduwa og roller skates ug roller blades nga adunay higayon nga makalapas sila sa balaod kay anha man sila sa karsada o aseras magduwa sa ilang skates.

Gipabasa ni Tumulak sa mao nga mga lider sa kahugpongan og tigduwa’g skates ang ordinansa sa dakbayan nga gidili gayud ang pagduwa diha sa karsada.

Matud ni Tumulak nga ang mao nga mga batan-on miingon nga ang kakuwang og dapit nga sila adto mag-praktis sa ilang napilian nga sports maoy nakapugos kanila nga anha sila magduwa sa karsada.

Ang mga batan-on giawhag ni Tumulak nga mangita sila og lugar nga ilang magustoan nga adto sila mag-praktis pagpahanaw sa ilang abilidad aron mahimoan kini og pagtoon sa mga opisyal sa dakbayan. (BANAT NEWS)