Mga kapitan gihatagan og deadline

CEBU, Philippines - Ang mga barangay kapitan sa dakbayan sa Sugbo giawhag nga mosumiter na sa ilang gusto’ng proyekto nga ipatuman sa tagsa-tagsa nila ka barangay alang 2015 nga gastohan gikan sa Local Development Fund (LDF).

Si Oscar Abordo, opisyal sa Cebu City Planning and Development Office (CPDO) mihatag og tagal sa mga kapitan nga mosumiter sa ilang proposed infrastructure projects sa dili pa karong Marso 26.

Giangkon ni Abordo nga daghang kapitan ug mga opisyal sa kabarangayan nga bag-o lang napili sa katungdanan dili pa makamao nga mohimo sa gikinahanglang dukomento alang sa paghimo og proyekto.

Matud ni Abordo nga kini maoy rason nga karong Pebrero 27 magpasiugda sila og briefing alang sa mga kapitan sa 80 ka barangay dinhi sa dakbayan aron tudloan sila unsaon paghimo og proposed infrastructure projects.

Si Abordo miingon nga karong tuiga miabot lang og P550.4 milyones ang kinatibuk-ang kantidad sa mga proyekto nga giaprobahan sa Annual Investment Plan (AIP) kay daghang mga barangay ang wala makasumiter og proyekto.

Matud ni Abordo nga daghan g’yud hinoon ang mga dukomento nga gikinahanglan alang sa katumanan sa mga gipangandoy nga proyekto sa mga opisyal sa barangay.

Giawhag sa opisyal sa City Planning and Development Office ang mga kapitan nga paspasan na nila ang paghuna-huna og mga proyekto nga mugnaon sa ilang mga  barangay.

Ang mga proyekto nga buot ipatuman sa lainlaing barangay dinhi sa dakbayan i-monitor kanunay sa City Engineer’s Office ug sa City Planning and Development Office aron pagsiguro nga nasubay kini sa mga lagda ug kapahimuslan gayud kini sa katawhan.

Apil sa mga proyekto mahimong maglakip sa pagpanindot sa karsada sa mga barangay, pagmugna og multi-purpose building ug uban pa.   (BANAT NEWS)