CEBU, Philippines - Gikonpirmar sa kadagkoan sa Department of Education (DepEd) nga adunay tinun-an sa 4th year high school dinhi sa dakbayan nga naghikog ug gituohan nga adunay problema nga personal.
Ang kadagkuan sa Cebu City National Science High School miangkon nga tinun-an nila sa fourth-year ang biktima.
Matud ni DepEd Cebu City Schools Division Superintendent Rhea Mar Angtud nga dili ang pag-ubos sa grado sa mao nga tinun-an maoy rason sa iyang pagpakamatay.
Si Angtud miingon nga iyang nahinabi ang ginikanan sa maong tinun-an apan mihangyo nga respitoan ang ilang privacy mao nga wala kaayo mobutyag og daghang impormasyon sa media ang opisyal sa DepEd.
Sa pakisusi ni Angtud gikan sa mga maestra sa tinun-an nahibaw-an nga wala’y problema sa academic ang bata tungod kay maayo kini og grado ug nakapasar pa gani sa mga periodical exams.
Ang mga kaklase sa tinun-an nga naghikog wala usab makamatikud nga naghambin kini og suliran apan gituohan nga ang bata personal g’yud ang hinungdan nga kini nagpakamatay.
Ang report nagkanayon nga nagbilin pa og video recording ang mao nga tinun-an diha sa cellphone nga nangayo og pasaylo sa iyang mga ginikanan ug mga igsoon kabahin sa iyang pagpakamatay. (BANAT NEWS)