Suspek sa planong pagpatay sa bise mayor ikiha na

CEBU, Philippines - Mga suspek sa suway nga pagpatay kang Bise Mayor Joel Dumdum sa lungsod sa Asturias giandam na sa kapolisan.

Matud pa ni Supt. Rodolfo Albotra ang hepe sa Provincial Intelligence Branch sa Cebu Provincial Police Office kasong kriminal batok kang Jonathan Rubi nga maoy gitumbok nga “hitman” ang ilang ipasaka, apan wala pa klaroha sa kapolisan kung unsa nga kaso.

Matud ni Albotra nga lakip sa pasakaan og kaso mao si Archie Alvarado ug ang lain pang duha ka personalities nga padayon pang gigukod sa PIB.

Apan posible nga mamahimong state witness si Alvarado kinsa nadakpan usab sa kapolisan sa followup operation ug miangkong siya maoy mihimo sa plano kun unsaon pagpatay ang bise mayor ug mitug-an kun si kinsa ang nagmando kanila.

Si Dumdum nga nahinabi sa Banat News miingon nga si Rubi gyud mao ang hitman ug ang napatay nga si Edgar Escalante (dili ang reporter) maoy back-up niini. Sa higayon nga motira na si Rubi si Escalante ang motiwas kaniya, sumala pa ni Dumdum. Mibutyag si Dumdum sa pangalan sa laing duha pa ka mga suspetsado apan gipugngan lang una kini sa Banat News sanglit nagsige pa man ang operasyon sa kapolisan.

Si Dumdum nagtuo nga politika gyud ang motibo sa maong suway sa pagpusil patay kaniya.

Ang hepe sa CPPO Sr. Supt. Noel Gillamac nga nahinabi sa mga tigbalita sa miaging semana miingon nga miduol kaniya si Dumdum sanglit nakadawat man kini og daghang hulga sa iyang kinabuhi. Matud ni Gillamac nga nagsugod ang maong hulga sa pagpahigayon og barangay election sa miaging tuig. (BANAT NEWS)