Ospital sa Lapu-Lapu gitabangan sa DOH

CEBU, Philippines - Ang pagpalambo sa serbisyo ngadto sa mga pasyente sa Lapu-Lapu City Hospital maoy hatagan og dakong pagtagad ni Mayor Paz Radaza pipila ka buwan gikan karon.

Matud ni Radaza nga ang Department of Health (DOH)-Regional Office-7 mihatag og P30 milyones  nga gahin alang sa pagpalambo sa Lapu-Lapu City Hospital.

Si Radaza miingon nga gamiton niya ang mao nga kantidad pagpalit og dugang kahimanan alang sa ospital nga nahimutang sa Barangay Gun-ob ingon man sa Santa Rosa District Hospital sa isla sa Olango.

Dugang ni Radaza nga P20 milyones ang iyang ipagahin sa Lapu-Lapu City Hospital ug ang laing P10 milyones para sa District Hospital sa Olango. Ang Olango gilangkoban sa 11 ka barangay ug daghan usab ang mga lumolupyo.

Si Radaza mitug-an sa iyang plano nga ang 70-bed capacity nga Lapu-Lapu City Hospital mapalapdan ug aron madugangan ang mga pasyente nga madawat.

Matud sa mayor nga iyang gusto nga makaangkon og dugang medical equipment ang city hospital sama sa X-Ray machines ug ubang laboratory equipment.

Ingon usab niini ang gusto nga mahitabo sa ospital sa Olango nga mapun-an ang ilang kahimanan ilabi na ang mga tambal aron molambo ang serbisyo ngadto sa katawhan nga dili na kinahanglang dad-on pa sa city hospital ang mga pasyente.

Ang ospital sa Olango gidumala sa kagamhanan sa Lapu-Lapu ug gigahinan og P20 milyones sa tibuok tuig.  (BANAT NEWS)