2 nalumos patay

CEBU, Philippines - Duha ka tawo  ang  namatay  sa pagkalumos sa dagat  sa duha  ka  lugar  sa lalawigan  sa Sugbo sa  miaging  Sabado.

Sila  mao  si Argie Bartolo Daño, hingkod  nga taga barangay  Cogon-Pardo, dakbayan  sa  Sugbo  ug  si Ritchie Temblor, 27, taga  barangay  Saavedra,  lungsod  sa Moalboal.

Si Daño  didto  malumos  sa  swimming  pool  sa usa  ka beach  resort sa Biasong, dakbayan  sa Talisay.

Matud  pa  ni Sr. Insp. Al Pascual  sa Talisay police  nga  kauban  si Daño  sa  iyang  mga  higala  nga  mitambong  og  birthday party   didto  sa   maong beach  resort. Tungod  kay  muinom,  padayon  kining  nakigtagay  sa iyang  mga  higala  ug  sa samang  higayon nagsawom-sawom usab  sa swimming  pool. 

Apan  malagmit  nahubog  na, nakita na lang  kini  sa usa  ka lifeguard  nga wala  na  maglihok  sa ilawom  sa swimming pool.

Dali  kining  gisakwat  sa lifeguard  ug  gihatud  dayon  ngadto  sa  South General Hospital  sa dakbayan  sa Naga apan wala  na  kini  makaabot  didto  nga  buhi.

Samtang  si Temblor  napalgan  nga  patay  na  didto  sa sitio Basdako,  barangay  Saavedra,  lungsod  sa Moalboal uban  sa nakuhang  isda  niini  sa iyang  pagpamana.

Matud  pa  sa kapolisan nga  migikan  kini  sa ilang  balay  nianang  alas 9:00 sa gabii  apan  pagkaugma,  nagpakitabang  na  ang  iyang apohan   sa kapolisan  kay wala  na  mahiuli  sa ilang  balay  ang  biktima. Si PO2 Manuelito  Abrenica  sa Moalboal  Police Station mibutyag    nga  ila  kining  gipangita apan napakyas  sila .

Midugang  siya   nga ang  mga  local  nga diver  sa Moalboal  mao  nay nakakaplag  sa lawas  patay  sa biktima  diin  ang   isdang  kuha  niini  iya  pang  gitangkil. Ang  mga  kapolisan sa   Talisay  ug  Moalboal  nga namatyan  sa mga  biktima  mitug-an  sa Banat News  nga wala  sila’y  nakitang  foul  play  sa  mga  biktima. (BANAT NEWS)