Northern Cebu gikalimtan
CEBU, Philippines - Grabe usab ang kadaot nga natagamtaman sa katawhan sa amihanang Sugbo sa dihang naigo kini sa kabangis ni super typhoon Yolanda, apan para ni Kongresista Benhur Salimbangon, gikalimtan lang ang Sugbo hilabi na sa mga hinabang nga gikan sa gawas sa nasud.
"President Aquino does not even mentioned Cebu nga naigo sa bagyo. All the international aid goes to Tacloban City, gikalimtan lang intawon ang Cebu," matud pa ni Salimbangon.
Matud pa ni Salimbangon mga 100,000 ka mga kabalayan sa amihanang Sugbo ang nangadaot nga mas daghan pa kun itandi sa Tacloban ug ubang dapit sa Eastern Visayas.
"Almost all the houses, schools, livelihood were lost. There is no power, no water, people are hungry unya hapit tanang tabang atua ra didto sa Tacloban. People in Northern Cebu badly needs help. Daghan na kaayo mga nasud nitabang, pila na ka bilyon pero asa na man na ron?," dungag pa ni Salimbangon.
Sa iyang bahin, nag-apod apod na siya og mga relief goods sugod pa niadtong Sabado apan tungod sa kalapad sa kadaot, dili gyud paigo sa paghupay sa kagutom sa mga residente.
Apan si Evelyn Senajon, officer-in charge sa Provincial Social Welfare and Development nagkanayon nga kada adlaw nga naghatud og relief packs ang Kapitolyo didto sa Northern Cebu sukad pa sa paglurang sa bagyo.
Magpadayon ang maong operasyon sud sa duha ka semana. Gihimakak usab nila ang report nga gipasagdan lang ang maong bahin sa lalawigan ug may pabor-pabor sa ilang panghatagan.
Sa laing bahin, nipahibalo ang Mariquita Salimbangon-Yeung Charitable Foundation, Inc. nga padayon ang ilang gihimong relief operations sa mga isla ug islets sa Amihanang Sugbo.
"Let us all gather hand in hand, together we will rise again. Be strong Cebu. We will pass this challenged," matud pa ni Mariquita Salimbangon-Yeung, ang founder sa maong foundation.
Ang MSYCFI mopahigayon og medical missions sa lungsod sa Medillen ug Daan Bantayan hilakip na ang Isla sa Malapascua karong Nobiyembre 16 ug 17, 2013.
Aduna usab silay drop-off center nga naa nahimutang sa lobby sa Cebu Holdings Center, Cebu City. (BANAT NEWS)
- Latest
