Dugang 58 drayber nalutsa’g warrant

CEBU, Philippines - Dugang 58 ka drayber og mga PUJ ingon man mga drayber og private vehicles ang nalutsan na usab og bench warrants ug sugdan na sa pagpangita sa mga polis sugod karong adlawa.

Si Joy Tumulak, operations chief sa City Traffic Operations Management (CITOM),  miingon nga usa sa mga PUJ drivers napasakaan og kaso tungod sa pagpanigarilyo samtang nag-drive sa sakyanan.

Silang tanang 58 ka drayber naisyuhan og Traffic Citation Tickets (TCT) apan wala magtagad pagbayad sa ilang multahanan kay nagsalig nga wala kuhaa ang ilang lisensya.

Kaniadtong miaging semana, 32 ka drayber ang nalutsan usab og bench warrant  ug walo na kanila ang nadakpan ug natugyan na ngadto sa hukmanan.

Nakabantay ang CITOM nga ang ubang mga drayber nga nalutsan og warrant sa hukmanan wala na mag-drive sa sakyanan nga kaniadto ilang gimaneho ug gituohan nga mibalhin sa pag-drive.

Apan matud ni Tumulak nga masakpan gihapon sila tungod kay ang mga traffic enforcers gibalhin-balhin nila sa pagdistino ug makakita ra gihapon kanila.  (BANAT NEWS)