Gipusil patay samtang naghantak

CEBU, Philippines - Namatay  ang  usa  ka  lalaki  nga misalmot  sa hantak human  pusila  sa wala hiilhi nga  mamumuno sa may sitio Nava Alaska, barangay Mambaling sa dakbayan sa Sugbo sa 1:50 sa kaadlawon kagahapon.

Ang biktima naila nga si Mario Nudalo Camanzo, 31, minyo ug lumolupyo sa   maong lugar.

Basi sa imbistigasyon nga gipahigayon nila ni SPO4 Rey Cuyos, PO2  Nilo Aventurado ug PO1 Joel Zamora sa homicide section,  nasuta   nga samtang ang biktima nag-antog  sa antugon  sa kilid sa dalan, kalit lang miduol ang kriminal  ug mipusil   kaniya.

Tungod  kay  naigo  sa  ulo ang biktima,  nahagba kini sa dalan  ug  diha-diha  namatay.

Human  matumba si Camanzo  nag-iyahay  og dagan ang iyang mga kauban nga  nagsugal tungod  sa  kahadlok.

Samtang  ang  kriminal dali usab kaayo nga   nakadagan paingon sa suok nga bahin sa sitio Nava Alaska.

Gihulagway kini  sa  mga  saksi   nga daot unya nagsul-ob og itom nga jacket.

Ang mga nirespondi nga polis nga gipangulohan ni SPO2 Teodor Lumandas nakapunit  og  kabhang sa wala pa matinong bala gikan sa nahitaboan.

Ang lawas patay  sa biktima  anaa  sa usa ka punirarya sa dakbayan aron ma-autopsy. (BANAT NEWS)