Vendor milutaw sa Mambaling
CEBU, Philippines - Usa ka vendor napalgang naglutaw sa dagat nga may samad pinusilan sa iyang dughan ug ulo diha sa sitio Puntod Alaska , barangay Mambaling, dakbayan sa Sugbo kagahapon sa alas 6:00 sa buntag.
Ang biktima giila ni SPO1 Victor Ruel Ayuman nga si Modesto Fernandez Jr., 33, nga gituohang biktima sa pagpamusil unya naanod sa dagat.
Base sa imbestigasyon sa kapolisan, ang mga residente sa Mambaling maoy nakakita sa naghayang na nga patay’ng lawas.
Wala pa matumbok sa kapolisan ang motibo ug kung kinsa mipatay sa biktima. (Bryner Diaz/EIM)
Nakapiyansa sa kaso sa illegal drugs na-buybust pag-usab
Sa ikaduhang higayon, usa ka giingong notadong drug pusher ang nadakpan sa buybust operation sa mga sakop sa City Anti-Illegal Drugs Special Operations Task Group sa miaging gabii diha sa dalan Magallanes sa barangay Ermita ning dakbayan sa Sugbu.
Ang nasikop nailhan nga si Roxan Quirante kinsa nakuhaan og usa ka bultong gituohang shabu. Matod pa sa hepe sa CAIDSOTG nga si Sr. Insp. Gerald Soquib nga nasikop na miaging buwan si Quirante sa mga sakop sa Philippine Drug Enforcement Agency-7 apan nakapiyansa. Dugang pa ni Soquib nga tagbo-tagbo lang ang pamaagi sa transaksyon ni Quirante. Napalitan sa mga polis og balor P17 mil nga shabu ang suspek hinungdan nga kini gidakop.
Si Quirante nagdumili paghatag og pamahayag bahin sa pasangil kaniya. (BANAT NEWS)
- Latest
