Road widening sa lutsanan gikan Gorordo padung Maxilom Avenues

CEBU, Philippines - Gisuportahan ni Mayor Michael Rama ang giplano nga proyekto sa Department of Public Works and Highways (DPWH) nga pagpalapad sa karsada nga gikan sa Gorordo Avenue nga molusot sa General Maxilom Avenue kilid sa simbahan sa Iglesia Ni Cristo.

Sayo pa si Rama kusganong misupak sa pagtukod og flyover project diha sa eskena Gorordo ug Archbishop Reyes Avenue tungod sa rason nga makaguba kini sa “historic value” sa maong dapit.

Ang plano nga pagtukod og flyover sa maong eskina nga gigahinan na unta og P300 milyones sa DPWH gikanselar na lang tungod sa pagsupak ni Rama ug sa pundok nga nagtawag og Livable Cebu.

Karong giplano ang pagpalapad sa karsada nga nagdugtong paingon sa General Maxilom Avenue si Rama miingon nga gisuportahan niya ang maong proyekto.

Kun mahuman na ang pagpalapad sa maong karsada himoon na kini nga “two-way” aron kadtong gikan sa D. Jakosalem o kaha gikan sa General Maxilom Avenue makahimo pag-agi niini kun moadto sila sa Lahug nga dili na moagi pa sa eskina Gorordo ug Maxilom.

Sa laing bahin, gibutyag ni Rama nga dili usab siya mosupak sa pagbutang og Metro Rail Transit (MRT) ug kaha Light Railway Transit (LRT) apan kinahanglan nga ang riles niini dili adto sa ibabaw ipaagi kay makadaut kini sa talan-awon. Buot ni Rama nga sa karsada   ibutang ang agianan niini nga sahi ra kaayo sa LRT ug MRT nga gituyo pagbutang sa ibabaw aron dili makabalda sa dagan sa mga sakyanan sa ubos. (BANAT NEWS)