Panaghiusa makapaumento sa Sugbo – Espina

CEBU, Philippines - Dako ang pagtuo ni kanhi Cebu governor Rene Espina  nga  kun  magkahiusa lang  ang  mga  politikong  Sugboanon  hayan  nga  taas  kaayo  og  dagan  ang  umento  sa ekonomiya  sa lalawigan.

Sa iyang  pagpamulong  atubangan  sa  mga  awardee  sa Ten Outstanding Cebuano Award (TOCA)  niadtong Sabado  sa gabii  didto  sa Sacred Heart Center  ning  dakbayan,  gibati  og  kahimangod  si Espina  sa kahimtang  sa mga  opisyal  sa kagamhanan  sa Sugbo.

Kini  gumikan  kay  matud  pa  niya  magpunay  lang  og  away  ug  wa  magkahiusa  tumong sa labing ikauswag  sa tibuok  lalawigan.

Si Espina  kinsa  nahimo  usab  nga  senador  sa nasud  nagkanayon  nga  ania  sa  mga  Sugboanon  ang  mga  maayong  laki  sa negosyo  ug  gani  anhi  unta  makita  usab  ang  labing  maayo  nga  matang  sa  mga   dagkong  negosyo  sa nasud.

Usa  sa gisugyot  ni  Espina  sa  kagamhanan  mao  ang  pag-usab  sa Konstitusyon   tungod  kay   daghang  maayong  laki  nga  politiko  sa Sugbo, apan usa  ray  senador  nga  mao  si  Cerge  Osmeña.

Gusto  ni  Espina  nga  matag  distrito  may  senador  usab  gawas  sa kongresista  aron  nga  labing  masinati  sa katawhan  ang  kaanindot  sa palibot  kansang  mga  proyektong  inprastraktura  manurok  mao  ra og  uhong.

Si  Espina  kinsa  maoy  nakapatukod  sa  unang  taytayan  sa Mactan  ug  Mandaue  sa panahon  sa iyang  pagka-gobernador  sa lalawigan  nagkanayon  nga  kun  nahimo  kadto  sa iyang  panahon, mas daghan  unta  ang  mahimo  karon  sa  mga  kasamtangang  politiko.

Gidayeg  niya  ang  mga  Cebuano  nga  malampuson  kaayo  sa ilang  patigayon  hinungdan  nga  napili    ug  takus  sa TOCA  award  kinsa  usa  usab  siya  sa napulo  ka  awardee.

Gani  nanghinaot  siya  nga  unta  sa  madugay  ug  sa madali  ang  isla  sa Mactan  mahisama  sa   Singapore  nga  tungod  sa kadaghang  negosyante  nga  nagpuyo,  usa  kini  sa labing  alegre  ug  inila sa tibuok  kalibotan  karon. (BANAT NEWS)