5-anyos nalumos human mataligm-an sa papa

CEBU, Philippines - Nalumos patay ang usa ka 5-anyos nga batang lalaki nga giingong nataligam-an sa iyang amahan samtang kini niuban sa pagpamukot sa dagat didto sa Sityo Pili barangay Prenza sa lungsod sa Balamban niadtong Biyernes sa alas 8:00 sa buntag.

Ang patay nang nakit-an ang batang si Danilo Lopez Jr, nagpuyo sa maong lugar sa amahan niini nga si Danilo Sr.,30.

Matud ni PO2 Godofredo Dumdum sa Balamban Police dihang nahinabi sa Banat News samtang namukot ang amahan nagkalingaw usab og kaligo sa dagat ang bata.

Apan samtang nanaktak na kini sa pukot ang amahan wala kini makabantay nga naabot sa lawom nga bahin ang iyang anak ug  dili kini makamaong molangoy.

Diha lang nabantayan nga wala na ang anak niini tungod kay wala nay nagsaba ug naglumpayat sa dagat ug sa iyang pagsusi milutaw na kini ug patay na.

Gisuwayan pa unta niya kini pagdala sa tambalanan apan gideklarar kining dead on arrival.

Ang kapolisan mosusi pa kung dunay tulobagon ang amahan sa bata sa maong hitabo, samtang ilang gipahimangnoan ang mga hamtong nga dili magkumpiyansa sa ilang mga lakaw kung duna silay kaubang mga bata.  (BANAT NEWS)