Kontraktor sa road widening sa lagtang , talisay ipatawag

CEBU, Philippines - Ang mayor sa dakbayan sa Talisay nga si Johnny De los Reyes mopatawag sa tag-iya sa QM Builder Construction nga maoy kontraktor sa road widening gikan sa barangay Lagtang paingon ngadto sa Toledo.

Gawas sa QM Builder ipatawag usab ang kapitan sa barangay Lagtang, hepe sa Department of Public Works and Highways (DPWH), Provincial Environment and Natural Resources (PENRO) ug Department of Environment and Natural Resources (DENR).

Ang maong tigum may kalambigitan sa nahitabong pagdakop niadtong Huwebes sa gabii sa mga trak nga gikargahan og mga anapog gikan sa gikubkob nga bukid sa road widening diha sa Lagtang.

Gikataho nga ang QM Builder mibaligya sa mga anapog nga wala gani permit gikan sa kagamhanan sa siyudad ug PENRO.

Ang maong proyekto ubos kini sa DPWH ug matud sa mayor nga buot lang siyang masayod hangtud kanus-a mahuman ang maong proyekto tungod kay nakahatag na kini og kahasol sa mga residente diha sa lugar.

Niining ulahi lang ang mga residente diha sa sitio Tangub, Lagtang nagreklamo kini sa tumang kalapok sa ilang karsada panahon sa ting-uwan ug tumang kaabog usab panahon sa ting-init. Ang ilang gitumbok nga hinungdan niini mao ang pagsige og kubkob diha sa bukid sa pagpalapad sa karsada.

Nabalaka usab sila nga mabungkag ang spillway nga gibuhat sa QM Builder nga temporaryo nilang agianan paingon sa bukirang barangay ug padulhog sa ubos.  (BANAT NEWS)